Morgunn upprisunnar

Það er gott að vakna snemma á páskadag. Finnst þér það ekki? Allir fæðast þeir af nóttu, boða dag, sem deyr inn í nýja nótt. Sólir rísa og hníga, mennirnir koma og fara, barnið vappar út í morgunskin ævinnar, heilsar hækkandi degi, sem óðar en varir fer að halla, og brátt skyggir af þeirri nótt, sem bíður allra. 

En einn morgunn stendur kyrr yfir öllum eyktamörkum, yfir ferli einstaklinga og kynslóða. Hann vitjar hverrar vöggu, brosir við hverja banasæng, og skín yfir hverja gröf, morgunn upprisunnar, páskanna. Sá morgunn lyftir brún yfir alla skugga, allar myrkar gátur. Því geislar hans boða það, að Drottins lífsins og kærleikans, Jesús Kristur, hefur sigrað og að enginn kross, engin grimmd né gaddur, ekkert svartnætti stöðvar þá sól, sem með honum reis. (Sigurbjörn Einarsson, biskup, Tímanum, 27. mars 1986)

Dr. Sigurbjörn heitinn biskup var ,,völundur tungunnar og frábær predikari" eins og Sigurður A. Magnússon ritaði í eftirmælum um Sigurbjörn. Tilvitnun hér að ofan styðja það. Á þessum tímum er hughreystandi að leita í smiðju þessa ástsælasta biskups Íslendinga.

Og ekki amalegt að hlusta á himneska tóna eftir Vivaldi þennan ,,morgunn upprisunnar".

Gleðilega páska!