Bjarni Benediktsson hefur treyst stöðu sína

Sagt er að undiralda sé í Sjálfstæðisflokknum um þessar mundir vegna komandi landsfundar. Það kann að vera þó ég hafi ekki orðið var við hana. Enda er ég bara almennur flokksmaður, óvígður og utan múra. Ég hef verið landsfundarfulltrúi á tveimur síðustu landsfundum Sjálfstæðisflokksins fyrir Sjálfstæðisfélag Kópavogs og vona að svo sé áfram, þó ég viti það ekki fyrir víst. Þessir tveir landsfundir hafa verið sögulegir enda hefur endurreisnarstarfið verið allsráðandi. Það sem hefur komið mér skemmtilega á óvart er hve mikil samstaða og samhugur hefur ríkt meðal landsfundarfulltrúa í stórum málum sem smáum. 

Það hefur ekki verið öfundsvert hlutverk að taka við formennsku í Sjálfstæðisflokknum eftir hrunið. Það gerði Bjarni Benediktsson og þurfti kjark til. Síðustu tvö ár hafa örugglega ekki verið dans á rósum fyrir formann Sjálfstæðisflokksins. Aldrei fyrr hefur andað svo köldu í garð flokksins enda gerðu trúnaðarmenn hans afdrifarík mistök í aðdraganda hrunsins. Þá hafa flestir fjölmiðlar og stjórnarliðar í sameiningu ráðist með kjafti og klóm á Sjálfstæðisflokkinn og forystumenn hans til að koma höggi á pólitíska andstæðinga sína. Oftar en ekki hefur þessi ófrægingarherferð verið óvægin og persónuleg. Við almennir flokksmenn höfum sömuleiðis verið á stundum dómharðir þegar okkur finnst forystan fara út af sporinu. Það hefur þó verið gert með góðum hug og til að rétta af stefnu flokksins í prinsipp málum. Þar hefur ekkert annað búið undir. Það kann þó að vera að sumir hafi sótt að formanninum til að koma höggi á hann til að bæta eigin stöðu innan flokksins.

Eflaust vilja sumir að Sjálfstæðisflokkurinn taki upp enn harðari stefnu í ESB málum meðan aðrir vilja ólmir taka upp stefnu Samfylkingarinnar. Þeir eru þó færri sem betur fer. Það ætti þó öllum að vera ljóst að enginn flokkur sem vill taka sig alvarlega og halda sönsum getur haft tvær stefnur í þessu grundvallarmáli í íslenskum stjórnmálum. Sjálfstæðisflokkurinn hefur skýra stefnu í málinu í dag og það er það sem skiptir núna höfuðmáli.

Tvisvar sinnum hefur Bjarni Benediktsson att kappi við öfluga mótherja í formannskjöri. Meirihluti landsfundarfulltrúa treysti Bjarna til að leiða Sjálfstæðisflokkinn. Ekkert bendir nú til annars en að svo verði áfram, að Bjarni Benediktsson verði endurkjörinn formaður og muni leiða næstu ríkisstjórn. Hvað sem verður þá skulum við ávalt láta sjálfstæðismenn sjálfa ráða för þegar valin er forysta flokksins en látum ekki andstæðingum Sjálfstæðisflokksins það eftir.

,,Pólitík er að deyja", segir Gnarr í Ameríku

 

Þetta er svo fáránlega mikið rugl í Jóni Gnarr að það er ekki annað hægt en að skella upp úr. En honum er dauðans alvara og eins gott að fólk átti sig á hvað býr undir áður en það er of seint.

Jón Gnarr hefur gaman að fíflast með fólk. Þannig gekk hann í kaþólska söfnuðinn fullur iðrunar og komst svo langt að taka að sér bóksölu kaþólsku kirkjunnar og lesa ritningarlestur á sunnudögum í Dómkirkjunni Landakoti. Þá sagði hann öllum að Guð væri hans æðsti herra, nú er það Grínið með stórum staf sem hefur leyst Guð af hólmi, eins og kom fram í ræðu hans í New York.

Ég er farinn að fatta grínið hjá Gnarr. Hann gengur í helgustu vé manna, lætur taka sig alvarlega en er allan tímann að gera grín að trúarsannfæringu eða pólitískum hugsjónum fólks. Honum er ekkert heilagt, ekki trúarbrögð, ekki stjórnmál og ekki stjórnsýsla. Þannig tekst honum að svívirða ,,helgidómana" hvern á fætur öðrum, vanhelga og drepa. Fyrst trúarbrögðin svo stjórnmálin. Grínistinn er borgarstjóri höfuðborgar Íslands! Eða eins og kom fram í ræðu hans í Ameríku:

Og ég held að við verðum að gera það, allt þetta með pólitík er búið, pólitík er að deyja. Öruggur dauðdaginn mun taka svolítinn tíma og eitthvað stórkostlegt kemur í staðinn. 

En hvaða stórkostlega fyrirbæri kemur í staðinn fyrir trúna og pólitíkina? Er ekki hér verið að leika sér að eldinum? Það óttast ég. Menn geta svo velt fyrir sér tengingunni við myndbandið hér að ofan.  

„Evran er ekki svöl“

Steingrímur á leið til Washington?

 

Þá hefur Steingrímur unnið einn sigurinn enn. Honum tókst að fá félaga sína í Vinstri grænum til að samþykkja allt sem hann hefur gert og segir að landsfundurinn hafi ,,skerpt línurnar" og landsfundurinn sé ,,gott veganesti" fyrir sig í göngunni framundan. Hér talar Maó íslenskra stjórnmála. Það var vel passað upp á það af hirðmönnum hans á landsfundinum að lýðræðið fengi ekki að njóta sín. Þannig mátti ekki álykta gegn neinu því sem Steingrímur og harðlínudeildin hans höfðu áður ákveðið. Þeir sem voru svo bjartsýnir að halda að þeir gætu varið heilbrigðiskerfið gegn frekari niðurskurði þurftu að sætta sig við ályktun sem ,,skerpti línurnar" hans Steingríms og gáfu honum gott í gogginn fyrir gönguna hans fyrir ,,alþýðuna".

Steingrímur er þvílíkur áróðursmeistari að hingað koma háttsettir yfirmenn í Alþjóðagjaldeyrissjóðnum til að læra af honum. Og snilldin í kringum ESB málið er sérkapítölu út af fyrir sig, en af sama meiði. Þeir dáðst af þeirri list hans að segjast vera vinna fyrir almenning á sama tíma og hann vinnur gegn honum. Þetta hefur fulltrúum AGS aldrei tekist. Við sjáum Grikkland sem dæmi þar sem fjandinn er laus og enginn ræður neitt við neitt. Og glæsilegur árangur Steingríms í Hofi um helgina bætir afrekaskrá hans hjá AGS. Það hefur jafnvel verið talað um að fá Steingrím sem ráðgjafa hjá sjóðnum, og víst er að hann hefur öruggt starf í hendi í útlöndum ef svikamylla hans gengur ekki upp á Íslandi. 

Þá væri nú hægt að fara að tala af alvöru um útrás stjórnmálamanna í alþjóðastofnunum. Halldór Ásgrímsson í Kaupmannahöfn, Árni Matt í Róm, Ingibjörg Sólrún í Kabúl og Steingrímur í Washington.

Ályktun um utanríkismál samþykkt

Þegar embættismaður ESB hitti ráðherra í ríkisstjórn Íslands

 

Sagan segir að háttsettur embættismaður Evrópusambandsins hafi verið kampakátur eftir að hafa hitt Össur Skarphéðinsson, utanríkisráðherra, skömmu eftir að sá síðarnefndi hafði afhent umsókn Íslands um aðild að sambandinu í Brussel. Össur hafði farið mikinn í yfirlýsingum að vanda:

Þá hefur okkur tekist ætlunarverk okkar með bravör. Umsóknin um aðild komin til Brussel og Ísland á hraðferð inn í Evrópusambandið. Ísland þarf sárlega á aðild að halda. Við þurfum aga, reglufestu og stöðugleika, og allt þetta færið þið okkur, ágætu félagar. Við þurfum engar sérstakar undanþágur í sjávarútvegsmálum. Þið verðið bara að hjálpa okkur að halda úti áróðri til að sannfæra Íslendinga um að okkar mál farnist best í ykkar höndum. Í landbúnaðarmálum þarf að taka til hendinni, eins og við sósíal-demókratar höfum löngum barist fyrir, og með aðild að ESB þá næst það allt fram án nokkurrar baráttu. Látið hendur standa fram úr ermum félagar og við verðum komnir inn innan tveggja ára, hér verður slegið hraðamet í inngöngu í sambandið!

Skömmu síðar hitti sami embættismaður ráðherra úr röðum Vinstri grænna. Embættismaðurinn byrjaði á að óska ráðherranum til hamingju með aðildarumsóknina og hrósaði í leiðinni hve ákveðin stjórnvöld væru að gerast aðilar að Evrópusambandinu. Vegna þessa mikla áhuga spurði embættismaðurinn hvernig best væri að hefja aðlögun Íslands að lögum og reglum sambandsins. Þar væri mest verk að vinna í landbúnaðar- og sjávarútvegsmálum, enda ljóst að gera yrði gagngerar breytingar í þeim málaflokkum hér á landi. En embættismaðurinn var heldur áttavilltur eftir að ráðherran svaraði með eftirfarandi hætti:

Þetta er allt saman einhver misskilningur. Ísland er ekki á leiðinni inn í Evrópusambandið. Minn flokkur er algjörlega andvígur aðild að sambandinu og hefur áskilið sér allan rétt að berjast leynt og ljóst gegn aðild. Við munum ekki aðlaga neitt né undirbúa neitt í landbúnaðar- og sjávarútvegsmálum, enda erum við ekki að ganga í Evrópusambandið.

Embættismaðurinn varð þá hvumsa og spurði hvort það væri ekki rétt að ríkisstjórn hans hefði sótt um aðild að Evrópusambandinu? Ráðherrann játti því. Þá bætti embættismaðurinn við: ,,Já, og þá eruð þið búin að undirgangast allar skyldur um aðild, alþingi er búið að samþykkja grunnregluverkið okkar, acquis. Þið eigið að hefja aðlögun, því án aðlögunar verður engin aðild. Þið hafið þegið IPA og TAIEX styrki frá ESB fyrir marga milljarða íslenskra króna til þessarar aðlögunar." Ráðherrann lét þetta ekki slá sig út af laginu, brosti og sagði að endingu: ,,Já, þú meinar það, ja, þetta er mál utanríkisráðherra, og er bara ætlað til heimabrúks fyrir hann og hans flokk, en við í Vinstri grænum höfum aldrei samþykkt þetta." Þá þótti embættismanninum réttara fyrir kurteisi sakir að kveðja með virtum og spurði hastur skömmu síðar aðstoðarmann sinn, sem hafði kynnt hann fyrir ráðherranum: ,,Ég bið þig að kynna þér betur viðmælendur mína næst. Þetta var ekki ráðherra í ríkisstjórn Íslands frekar en þú er forseti framkvæmdarstjórnar ESB!"

Sel þessa sögu ekki dýrari en ég keypti hana.

Aðildarsinnar ráða för í Vinstri grænum

 

Farið út og boðið mikla andstöðu okkar við aðild að Evrópusambandinu, sögðu ímyndunarfræðingar Vg fyrir síðustu alþingiskosningar. Þeir vissu að þetta myndi færa þeim atkvæði og sérstaklega í kjördæmi formannsins fyrir Norðan. Og það gekk eftir. Á sama tíma voru forystumenn Vg búnir að semja við ESB flokkinn um að lögð yrði inn umsókn um aðild að Evrópusambandinu strax að loknum kosningum.

Umsóknin þýddi eins og komið hefur í ljós að Ísland samþykkti lög og reglur Evrópusambandsins (acquis), gerður yrði aðlögunarsamningur og aðlögun hæfist af fullum krafti. Allt hefur þetta gengið eftir. Meiri en milljarður króna er settur af skattfé til að undirbúa aðild, ESB leggur fram aðlögunarstyrki, áróðursstyrki og sérfræðingastyrki til að tryggja að Ísland geti orðið hluti af Evrópusambandinu eins fljótt og mögulega hægt er.

Þá er það þekkt strategía í umsóknarlöndum ,,að yfirtaka" stjórnmálaflokk sem er andvígur aðild. Þá er látið líta út svo gagnvart almennum félögum að flokkurinn sé andvígur aðild en bakvið tjöldin vinnur forystan hörðum höndum að aðild. Þannig er flokkurinn gerður óvirkur í andstöðunni. Þetta tókst í Vinstri grænum. Flokkurinn er skólabókardæmi um þessa aðferðarfræði. Þetta var líka reynt í Sjálfstæðisflokknum en tókst ekki vegna mikillar andstöðu almennra flokksfélaga. Það sýnir best að lýðræðið virkar í dag í Sjálfstæðisflokknum, en hefur að sama skapi algjörlega brugðist í Vinstri grænum. Landsfundur þeirra um helgina hefur staðfest það.   

Samið fyrirfram um ESB umsókn

Mikil sóknarfæri í mjólkurframleiðslu

Íslenska kýrin er í sjálfu sér nokkuð mjólkurlaginn. Hún hefur erfðafræðilega getu til að mjólka mun meira en meðalbúið á Íslandi er að gefa. Þar eru því mikil sóknarfæri og við eigum mjög mikið inni. Með aukinni byggrækt ætti að vera hægt að auka framleiðsluna talsvert. Þetta liggur í fóðrun, meðferð og svo auðvitað kynbótum. Ég álít að um þriðjungur aukningarinnar ætti að nást með kynbótum en um tveir þriðju í gegnum fóðrun. ...

Augljóst ætti því að vera að bætt fóðrun og kynbætur gætu gefið talsvert af sér í auknum framleiðsluverðmætum.

Þetta kemur fram í viðtali við Grétar Hrafn Harðarson, dýralækni og tilraunastjóra tilraunabúsins Stóra-Ármóts, sem Hörður Kristjánsson, ritstjóri Bændablaðsins, tók við hann og birtist í Bændablaðinu sem var dreift með Morgunblaðinu í dag.

224% aukning á innflutningi á erlendu nautakjöti

Á tímabilinu janúar 2011 til og með ágúst 2011 þá voru flutt inn 944.198 tonn af kjöti miðað við 414.781 tonn á sama tímabili í fyrra. Þetta er 128% aukning á innflutningi. Mest var flutt inn af alifuglakjöti, eða 429.589 tonn, en næst mest af nautakjöti 306.895 tonn. Aukningi í innflutningi af erlendu nautakjöti er því 224%. Síðastliðna 12 mánuði hefur kjötsala dregist saman um 3,4%. Þetta kemur fram í nýjasta Bændablaði, sem kom út sl. fimmtudag.

Flísin og bjálkinn

 

Það er þá von fyrir Ísland eftir allt saman. Það ætti að biðja reiknimeistara ríkisins að reikna ríkisbókhaldið aftur og aftur þangað til við finnum alla földu milljarðana, sem útrásarvíkingarnir kostuðu illa leikinn ríkissjóð. Það mætti örugglega nota Ríkisendurskoðun til að endurskoða ríkisreikningana og svo mætti fá framsóknarmanninn með stórum staf, hann Hauk Ingibergsson, forstjóra Þjóðskrár, til að yfirfara talninguna, enda frægur að umpóla úrslitum eins og frægt var á Framsóknarþinginu um árið. Og ef þetta dugar ekki til þá er um að gera að vekja upp Samkeppniseftirlitið, sem ævinlega yfirsést risastóru samkeppnisbrotin. Þeir virðast bara sjá örlítið brot af öllum samkeppnisbrotum sem viðgangast á degi hverjum í íslensku viðskiptalífi. Ef eftirlitið færi í sjónpróf og fengi sér ný samkeppniseftirlitsgleraugu þá myndi örugglega víða finnast stór samkeppnisbrot sem gætu halað inn stórum sektargreiðslur í ríkissjóð. Þar á bæ sjá menn bara flísarnar en aldrei bjálkana. 

55 milljarða reiknivilla í Þýskalandi

Steingrímur lýsti yfir stuðningi við áform Jóhönnu í ESB málum. Stefnan óbreytt

 

Auðvitað á hreyfing sem var kosin út á ESB andúð, ekkert að vera með neina ESB andúð þegar hún er komin til valda. Það er hárrétt hjá Þráni, sem hefur alltaf jafnrétt fyrir sér. Auðvitað á að halda stefnunni óbreyttri þrátt fyrir fjöldamótmæli og að nýlegar tölur sýni að þorri heimili landsmanna eigi við jafn mikinn skuldavanda að etja og þegar stjórnin hans Steingríms og hennar Jóhönnu tók við völdum. Nei, það er jafnrétt hjá Þráni að það á ekki ,,að segja fólki að fara til fjandans" - það á að fara með það til fjandans! 

Og auðvitað er það alrangt hjá Hjörleifi Guttormssyni, fyrrverandi ráðherra, að ,,VG standi uppi rúin trausti" ef ekki verður grundvallarbreyting á afstöðu hreyfingarinnar til viðræðna við ESB. Svona segja menn ekki á stuðningsmannasamkomu Steingríms Joðs og hlýtur þessi einn af áhrifaríkustu stofnendum VG að falla í ónáð hér með.

Steingrímur sjálfur áréttaði að engin stefnubreyting yrði í ESB málum og hana nú! Mikið hlýtur Jóhanna að vera glöð eftir þessa ræðu Steingríms. Hún getur haldið ótrauð áfram með Ísland inn í ESB fyrir næstu kosningar eins og hún lofaði félögum sínum um síðustu helgi. Stefnan er óbreytt.

Stefnan óbreytt

Sögur má ekki skemma með sannleikanum

 

Það á aldrei að láta góða sögu líða fyrir sannleikann. Það hafa spunameistarar stjórnarliða lært hjá lærimeisturum sínum, sem eru hoknir af aldagamalli reynslu í pólitískum refskap. Svo lengi þráðu þau völd að þau eru tilbúin að gera allt til að halda í þau með kjafti og klóm.

Þannig eru fallegu loforðin flest löngu fokin út í veður og vind. Það sem átti að verða vinstri stjórn varð vinastjórn fjármálakerfisins, sem olli hruninu og heldur almenningi og atvinnulífinu ennþá í skuldafjötrum. Án almennrar skuldaleiðréttingar verður enginn alvöru hagvöxtur. Það sem átti að verða skjaldborg um heimilin varð skjaldborg um fjármálastofnanir og handvalinn hóp viðskiptajöfra, sem fengið hafa milljarðaniðurfellingar í skuldasósíalisma stjórnvalda. Á sama tíma hefur millistéttin, þorri almennings, ekki fengið krónu í niðurfellingu af húsnæðislánum sínum, heldur fengið að kenna á verðtryggingunni sem malar gull fyrir fjármagnseigendur. Allt var þetta gert með vitorði og vilja Alþýðusambands Íslands, sem gárungarnir kalla orðið Samband íslenskra fjármagnseigenda. Efnahags- og viðskiptaráðherra finnst gaman að segja söguna um vondu skuldarana sem ætla að ræna lífeyri gamla fólksins. Aldrei heyrist hann segja þá sögu þegar milljarðar eru þurrkaðir út af skuldum stóru kallanna í viðskiptalífinu. En hann er auðvitað jafngóður sögumaður og leiðtogarnir.

Og þá finnst þeim öllum í norrænu velferðarstjórninni ekkert skemmtilegra en að ráðast á sjávarútveginn. Ímyndunarsérfræðingar stjórnarinnar hafa fyrir löngu bent þeim á að það auki vinsældir þeirra og haldi stuðningsmannaliðinu saman. Þess vegna fara þau alltaf að tala um vondu sægreifana þegar þeim vantar mál til að berja liðið saman. Vita að vísu vel að allir gráðugu sægreifarnir búa erlendis og eru fyrir löngu horfnir úr sjávarútveginum með skattlausan milljarðahagnað, en látum það ekki skemma góða sögu. Já, stjórnmálin eru kabarett.

Forsætisráðherra fer með rangt mál