Those were the days my friends! Peningar koma og fara en fólk ekki

Þar sem er væntumþykja, þar er líf; hatur leiðir til tortímingar.   

          Gandhi

Í dag er bundinn endi á kafla í sögu þjóðar sem fór fram úr sjálfri sér. Gjaldþrot Björgólfs Guðmundssonar er persónulegur harmleikur, ekki aðeins fyrir hann og fjölskyldu hans, heldur fyrir þúsundir annarra sem dragast með í kjölsoginu. Og víst er að hann verður ekki sá eini sem fellur í kjölfars hrunsins sem læddist að þjóðinni sem þjófur að nóttu.

Höfum hugfast að peningar koma og fara en fólkið okkar ekki. Höldum þess vegna vel utan um hvert annað, eins og Hermann Gunnarsson, myndi segja, og spyrjum ekki í forundran í anda nýfrjálshyggjunnar: Á ég að gæta bróður míns?

Traust í viðskiptum er grunnur að heilbrigðu og öflugu viðskiptalífi. Þegar það er ekki lengur til staðar stöðvast hjartasláttur efnahagslífsins með skelfilegum afleiðingum í bráð og lengd. Vítahring sjálfselsku, vantrausts og græðgivæðingar þarf að rjúfa. Þá getum við hafið endurreisnina og byggt upp traust að nýju.

Það er svo vel við hæfi að taka lagið með Mary Hopkins frá sjöunda áratug síðustu aldar: Those were the days my friends! Það á vel við í dag í aðdraganda þjóðhátíðar.

  

Björgólfur gjaldþrota

Það kemur okkur enginn til hjálpar nema við sjálf!

Þessi tíðinda frá AGS áttu ekki að koma neinum á óvart. Auðvitað vilja þeir sem standa á bak við AGS og ESB fá peningana sína til baka með rentum. Og auðvitað fara þeir ekki að lána meiri peninga án þess að fá ríkisábyrgð viðurkennda á lánunum sem ólánsömu fjárglæframennirnir fengu fyrir spilapeningum í spilavíti glópa og græðgi.

Öll þjóðin myndi standa bakvið stjórnvöld sem einn maður í erfiðri baráttu þeirra við umheiminn ef þau sýndu bara auðmýkt og einlægan samstarfsvilja til að skapa þjóðarsátt um verkefni morgundagsins. Það gera þau aðeins með því að leggja öll spilin á borðið og með því að viðurkenna að þau hafa ekki svör við öllu. Svörin finnum við saman þegar við snúum bökum saman gegn harkalegum kröfum umheimsins, sem sýnir okkur enga miskunn. Aðeins við leysum vandann heima fyrir og þannig munum við öðlast traust umheimsins að nýju. Franskir og hollenskir stjórnmálamenn hafa rétt fyrir sér þegar þeir segja að Evrópusambandið sé ekki góðgerðastofnun sem gráðugar þjóðir geti leitað til um aðstoð þegar öll önnur sund virðast lokuð. Og sannanlega er AGS engin góðgerðastofnun heldur ef einhver hefur haldið það í einfeldni sinni.

Ég ætlaði mér ekki að hafa þennan pistil langan en botna hann með lagi og söng frönsku söngkonunnar Barböru frá 1966. Við gætum ímyndað okkur að Jóhanna, forsætisráðherra, sæti við píanóið og söngur hennar væri um hvenær AGS eða ESB kæmi Íslandi til bjargar!

Dis, quand reviendras-tu,
Dis, au moins le sais-tu,
Que tout le temps qui passe,
Ne se rattrape guère,
Que tout le temps perdu,
Ne se rattrape plus,
o.s.frv.

Síðan hef ég sett tónlistarmyndbönd hér hliðar undir Tónlist og einnig undir tenglar neðar.

   

Afgreiðslu AGS frestað

Þorsteinn Már stendur skil á sínu. Finnum fjársjóði skattsvikaranna í skattaparadís og gröfum þá upp!

Auðmenn sem eru ekki skattfælnir og eru skattkóngar eru gæfa Íslands. Og þegar við bætist að þeir reka eitt af blómlegustu sjávarútvegsfyrirtækjum landsins og færa þannig þjóðinni björg í bú þá kórónar það gæfuna. Við eigum að vera stoltir Íslendingar af mönnum eins og Þorsteini Má Vilhelmssyni sem möglunarlaust greiða skatta til samfélagsins, jafnvel af tekjum sem verða til af sýndarhagnaði á pappír. Það er eitthvað sem er hönd á festandi fyrir ríkissjóð. Og þetta meina ég fölskvalaut.

Ég tek undir með Þorsteini að helst vill maður að skatturinn, sem tekinn er af mínum launatekjum, sé varið í heilbrigðiskerfið, sem sannanlega þarf á fjármunum að halda til að lækna sjúka. Reyndar er hvimleið stafsetningarvilla í frétt mbl.is og sagt að Þorsteinn ,,vilji sjá skatti sínum varið í helbrigðiskerfið", og sennilega var þetta sami blaðamaðurinn og hringdi drukkinn í Jón Ásgeir og hótaði honum öllu illu. En kannski býr eitthvað meira undir hjá Mogganum sem vill senda eiganda sínum skilaboð. Sennilega er þetta bara saklaust innsláttarvilla. En hver veit nú á tímum?

Höfum meiri áhyggjur af þeim sem vantar á listann

Ég hef hins vegar miklu meiri áhuga á þeim aðilum sem vantar á lista skattsins yfir skattkónga. Hvar eru þeir með peningana sína? Fjölmiðlar ættu að að leita að þeim frekar en að eltast við þá skattkónga sem sannanlega greiða sinn skerf til samfélagsins með fögnuð í hjarta, eins og Þorsteinn Már, útgerðarmaður og hetja þeirra Norðanmanna í atvinnumálum. Ég ætla ekki að nefna nein nöfn en það ætti að vera auðvelt að finna þá aðila sem berast mikið á og eru tíðir gestir í Séð og Heyrt vegna veislugleði eða íburð og bera saman við skattskrár, sem nú eru komnar út. Í dag er aldrei mikilvægara en að ná í skottið á stórtækum skattsvikurum, sem svíkja og stela af samborgurum sínum, sem varla standa undir auknum álögum. Þar eigum við ekki að eyða kröftum okkar að eltast við litlu karlana.

En munu fjölmiðlar sinna þessari rannsóknarskyldu sinni við samfélagið?

Þorsteinn Már: Vill helst sjá skattana fara í heilbrigðiskerfið

Glæpalýðurinn fundinn - gamla fólkið!

Ég veit ekki hvað Mogginn er að hafa fyrir því að eltast við ,,götustrákinn" Jón Ásgeir sem hefur örugglega allt sitt á þurru eins og alþjóð veit. Þá skil ég ekki hvað Jón Ásgeir er að standa í þessu sjálfur og af hverju hann lætur ekki fjölmiðlana sína sjá um þetta fyrir sig eins og hingað til.

En fjölmiðlar ættu frekar að gefa því gaum að alvöru glæpamenn þjóðarinnar eru fundnir og Mogginn fjallaði um það á áberandi stað í morgun. Jú, það eru ellilífeyrisþegarnir, gamla fólkið, sem hefur ,,svikið" út bætur og ekki gefið upp fjármagnstekjur í stórum stíl. Að aflétta bankaleyndinni um síðustu áramót breytti litlu fyrir auðmennina enda höfðu þeir vit á að geyma gull sitt í erlendum skattaskjólum en gamla fólkið fær nú að finna fyrir þessari aðgerð stjórnvalda enda hafði það ekki efni á ráðgjöf frá fínu endurskoðunarfyrirtækjunum með erlendu heitunum.

Forstjóri Tryggingastofnunar telur þetta ,,algjörlega óviðunandi". Örugglega verður málið kært til sérstaks saksóknara og ekki kæmi mér á óvart að Víkingasveitin yrði send til að taka á þessum glæpalýð. Það kom fram í máli í forstjórans að innheimtuaðgerðir muni hefjast strax 1. september. Já, hér er ekkert hik og humm með vísun í réttarríkið, eins og þegar stjórnvöld eru spurð um aðgerðir gegn fjárglæframönnum.

Á sama tíma og gamla fólkið ,,sveik" með þessum hætti út bætur til að hafa í sig og á þá stunduðu auðmenn Íslands fjármagnsflutninga í stórum stíl í skattaskjól til að koma milljörðunum sínum undan beint fyrir framan nefið á skattyfirvöldum. Einn ágætur auðmaður, sem nýlega lét innrétta allt fína einbýlishúsið sitt á Nesinu að nýju fyrir milljónir, lét hafa eftir sér í fjölmiðlum að allt væri þetta ,,eðlileg fjárstýring". Já, hér ræðir hann um einkafjármál sín eins og fjármál stórfyrirtækis enda milljarðar í húfi. Á sama tíma þarf gamli maðurinn, sem ,,gleymdi" að telja fram þúsundkallana sína sem hann fékk í fjármagnstekjur af ævisparnaði sínum, að endurgreiða stóran hluta ellilífeyris síns til ríkisins. Er þetta réttlæti og jöfnuður Nýja Íslands?

Sérstakur saksóknari, sem ver degi sínum að mest til að safna gögnum og flokka, telur enga ástæðu til að kyrrsetja eignir þessarar auðmanna, sem áfram ,,leika við hvern sinn fingur" í útlöndum en að vísu án einkaþota og lystisnekkja.

e.s. Takið þátt í skoðanakönnun hér til hliðar um frítekjumark fjármagnstekna -->

Yfirlýsing frá Jóni Ásgeiri Jóhannessyni

Gunnlaugur hlaupi uppi glæpamennina!

Gunnlaugur Júlíusson, langhlaupari með meiru, hefur nú ,,hlaupið" góðverk, ef svo mætti að orði komast. Gunnlaugur er ótrúlegur langhlaupari en færri vita að hann er hagfræðingur góður. Ísland þarf svo sannanlega á mönnum að halda eins og Gunnlaugi sem hafa þol til að hlaupa langhlaup og hafa þor til að beita hagfræðinni þjóðinni til hjálpar. Hinir hagfræðingarnir geta reiknað okkur til óbóta en víst er að hagfræðingurinn Gunnlaugur gefst ekki upp þó tölurnar kunni að reyna á þol og þor.

Ég óska Hollvinasamtökum Grensásdeildar til hamingju með langhlaupið og víst er að starfsemi hollvinasamtaka er þreytandi langhlaup. Mættum við biðja Gunnlaug að hlaupa næst uppi glæpamennina og aðstoða þannig fjársvelta lögregluna, sem fær nú að kenna á svikamyllu fjárglæframannanna sem hlupu af sér allt eftirlit stjórnvalda og eru á góðri leið með að hlaupa frá glæpnum.

Safnaði 1.356 þúsund krónum fyrir Grensásdeildina

Pólitík til heimabrúks hér heima

Þessi viðbrögð frá Hollandi eru eðlileg og ættu ekki að koma neinum á óvart. Ráðherrar, og stjórnarliðar, hér á landi keppast við að gera lítið úr þessum viðbrögðum hollenskra stjórnmálamanna og tengingunni á milli Icesave og aðildar Íslands að Evrópusambandinu. Það er sannanlega pólitík til heimbrúks hér heima og ekkert annað. Þannig segir í frétt á EUObserver í dag:

Iceland's EU entry will not be a walk in the park, however.

Dutch EU ambassador Tom de Bruijn on Monday ruffled feathers by saying Iceland must repay €1.3 billion of debts caused by a 2008 bank collapse before its EU bid goes ahead.

"The Brits [which are owed €2.6 billion] are no longer making this a condition. But the Dutch want their money back," an EU diplomat said.

Kaldur veruleikinn er þessi. Evrópusambandið setti löggjöf um innistæður sparifjáreigenda í öllum aðildarríkjum ESB og EES. Íslandi bar að innleiða þá löggjöf, sem og Alþingi Íslendinga gerði árið 1999, án athugasemda eða óska um undanþágur. Við verðum þess vegna að taka afleiðingum gjörða stjórnvalda okkar og sýna í verki, áður en við göngum inn í Evrópusambandið, að við tökum löggjöf frá Brussel alvarlega. Eða sbr. viðvörunarorð hollenska utanríkisráðherrans Maxime Verhagen 22. júlí í DutchNews.nl til okkar:

'A solution to the problems round Icesave could lead to the speedy handling of Iceland's request to join the European Union,' Verhagen said. 'It could show that Iceland takes EU guidelines seriously.'

Almenningur vissi ekkert um málið 

Það sem ég hef hins vegar gagnrýnt, og þorri almennings, er að vitneskjan um þennan gjörning stjórnvalda var ekki kynnt fyrir þjóðinni, eða hvaða afleiðingar löggjöfin gat haft fyrir ríkissjóð, eins og því miður hefur komið í ljós. Jafnframt gerðu stjórnvöld ekkert til að lágmarka þá miklu áhættu sem fólst í innleiðingu ESB löggjafarinnar fyrir lítið hagkerfi með sjálfstæða mynt, heldur þvert á móti þá virtist eftirlitsstofnunin Fjármálaeftirlitið hafa litið á sig sem klappstýru einkabankanna og aðstoðað þá að ná fótfestu og trúverðugleika í Bretlandi og Hollandi. Þar liggur þeirra ábyrgð sem hlýtur að hafa í för með sér ákærur á hendur embættismanna í kjölfar rannsóknar Alþingis og sérstaks saksóknara. Jafnframt þarf að skoða þátt stjórnmálamanna í þessum harmleik öllum.

Það er þess vegna skrípaleikur og barnaskapur að þykjast undrandi og hneykslaður á viðbrögðum Hollendinga. Þeir hleyptu umsókn Íslands vissulega i gegn en ég geri sterklega ráð fyrir því að framkvæmdarstjórn ESB horfi til Icesave málsins í sinni viðamiklu athugun á stöðu íslenska stjórnkerfisins sem nú er komin í gang á vegum hennar. Síðan geta Hollendingar alltaf beitt áhrifum sínum á lokastigi málsins þegar aðildarsamningur liggur fyrir og fer fyrir ráðherraráð og leiðtogaráð ESB. Þess utan bíð ég eftir viðbrögðum Tyrkja við umsókn Íslands og eftir þeim verður sannanlega tekið.

Gagnrýna utanríkisráðherra ESB

Enginn varanlegur friður án réttlætis

Angelina Jolie er ekki aðeins stórkostleg leikkona heldur vinnur hún ómetanlegt starf að mannúðarmálum í Afríku. Hún er verðugur sendiherra góðgerðarmála Sameinuðu þjóðanna. Hún hefur sérstaklega einbeitt sér að Darfur héraði í Súdan þar sem þjóðarmorð hefur verið framið og alþjóðakerfinu hefur ekki tekst að stöðva með viðunandi hætti. Eftirfarandi ræða hennar er átakanleg og áhrifarík sem fær okkur til að sjá að vandamálin okkar hér á Íslandi virðast vera hjóm eitt miðað við það sem fólk í ýmsum löndum lifir við daglega.

Í gær voru fluttar fréttir af því að íslenska ríkið þarf að skera niður þróunaraðstoð um 1 milljarð á næsta ári, sem er reyndar ,,ekki nema" helmingur af því sem Bretar fengu frá okkur fyrir lögfræðikostnaði þeirra vegna Icesave.

Hér koma nokkrar tilvitnanir í orð Angelinu sem fær mann til umhugsunar í víðara samhengi. Höfum við t.a.m. ekki heyrt orð stjórnmálamanna hér á landi sem segja að fyrst þurfi að gera þetta og hitt til að koma ,,á friði", nú sé ekki rétti tíminn til að berjast fyrir réttlætinu, það komi síðar.  

Réttlæti virðist oft vera munaður ríkra og auðugra þjóða.

Friður er settur skör hærra en réttlæti og oft í stað réttlætis.

Við látum þá sem rústa löndum sínum ákveða framtíðina fyrir lönd sín.

Það kemst ekki á varanlegur friður án réttlætis.

Vondu mennirnir eru ennþá þarna.

Enginn á að þurfa að velja á milli friðar og réttlætis.

Ég læt síðan annað myndband fylgja um réttlætið og hvaða tími hentar til þess að berjast fyrir því og rímar vel við orð Angelinu hér að ofan. Þetta er úr bíómyndinni The Great Debaters frá árinu 2007.

Það er svo vel við hæfi að láta Lúðrasveit verkalýðsins enda þennan pistil um frið og réttlæti, sem var reyndar tengdur fréttinni um Ísland og Evrópusambandið, þar sem Össur lét hafa eftir sér í Evrópu að Ísland gæti vel lifað án Evrópu! Já, þetta er nýr tónn úr herbúðum Samfylkingarinnar sem hefur boðað hér djöful og dauða ef við hlypum ekki inn í Evrópusambandið - helst í gær!

En það sem er merkilegt við myndbandið hér á eftir er að það er tekið upp 1. maí 1991 eða næstum á sama tíma og Viðeyjarstjórn Davíðs Oddssonar og Jóns Baldvins Hannibalssonar var mynduð. Það voru tímamót í íslenskum stjórnmálum. Og nú marserar verkalýðshreyfingin inn í ESB í boði fyrstu alvöru vinstri stjórnar Íslands.

„Getum lifað án Evrópu“

,,Reglurnar gilda ekki um okkur auðmennina"

Þarna hefur mbl.is haft rangt eftir talsmanni Björgólfsfeðga. Fyrirsögnin áttu örugglega að vera þessi hér að ofan, þ.e.a.s. talsmaður hefur sagt að regurnar giltu ekki um þá eða aðra auðmenn Íslands. Enda áttu þeir bankana, fjölmiðlana, óskabörn þjóðarinnar, bankastjóranna, eftirlitsstofnanirnar og stjórnmálamennina. Þannig hefur Ásgeir mjög líklega sagt við blaðamann mbl.is:

Reglurnar voru klæðskerasniðnar fyrir Björgólfsfeðga og auðmannastéttina. Reglurnar voru einfaldlega á þá leið að við máttum gera allt sem okkur langaði til og bankarnir áttu að lána okkur alla þá peninga sem við þurftum. Við áttum ekki að hafa áhyggjur af neinum ábyrgðarmönnum, frekar en námsmenn hafa frá og með deginum í dag, því ef við gætum ekki borgað skuldir okkar þá skyldi þjóðinn borga. Það átti að vera alveg á hreinu þegar við ,,keyptum" ríkisbankana að þetta væru áfram ríkisbankar með ríkisábyrgð. En að sjálfsögðu mátti bara ekki segja það enda hefði þjóðin þá heimtað að við borguðum eitthvað fyrir þá, sem stóð aldrei til að við gerðum. 

Svo vil ég taka fram að ég skil ekki hvaða læti þetta eru í dag í fólki að ætlast til að auðmennirnir beri einhverja ábyrgð á hruninu í haust þegar formaður Fjármálaeftirlitsins hefur gefið okkur hreint sakavottorð þegar hann gaf það út að fjármálakerfið hér á landi hafi hrunið út af ,,kerfislægum" vanda. Þannig að fólk ætti að beina reiði sinni að kerfinu, og kerfisfræðingunum, en ekki að auðmönnum sem eru saklaus fórnarlömb eins og almenningur í þessu landi. Þetta er farið að jafnast á við argasta einelti gegn umbjóðendum mínum sem eiga mjög erfitt um þessar mundir og hafa m.a. þurft að selja einkaþotur og einkasnekkjur sínar.

Reglurnar eigi ekki alltaf við

Berjumst ekki á mörgum vígstöðvum samtímis. Bretar beita ,,klippum" sínum á Íslendinga

Það er slæm herstjórnarlist að berjast samtímis á mörgum vígstöðvum. Hvað þá að senda herinn í orrustu vanbúinn með öllu þar sem baráttuviljann og samstöðuna vantar. Munum að eins og í skákinni þá kallar einn afleikur á annan ef við náum ekki vopnum okkar að nýju!

En þannig hyggst ríkisstjórn Íslands halda á málum því miður. Aðildarumsókn að Evrópusambandinu var keyrð í gegnum Alþingi Íslendinga með ,,ofbeldi", að sögn þingmanna, og Icesave málið hvílir sem mara á alþingismönnum og íslensku þjóðinni.

Hvort sem okkur líkar betur eða verr þá á Ísland í stríði við umheiminn og innanlands hefur geisað hálfgert borgarastríð frá hruninu í haust. Bretar beittu okkur fyrst ofbeldi með hryðjuverkalögunum og ætla nú að ganga til bols og höfuðs á þessum ,,gamla fjandmanni" sínum með Icesave drápsklyfjunum. Það eru þeirra stríðsskaðabætur bæði fyrir fjárglæframennina okkar og þorskastríðin. Þetta eru þeirra ,,klippur" á togarana okkar. Já, þeirra krókur á móti bragði ef svo mætti að orði komast. Ef ,,hernaðaráætlun" þeirra gengur eftir þá rennur andvirði alls þorskaafla Íslendinga til þeirra eftir 7 ár og síðan þegar Ísland er komið í Evrópusambandið þá er tryggt að breskir togarar með breska sjómenn veiði á ný við strendur Íslands - án herskipaverndar!

Ég er þess vegna algjörlega sammála nafna mínum Bjarnasyni að full ástæða er til að staldra við og meta stöðu Íslands í ljósi stöðunnar. Það er heilbrigð skynsemi. Hygginn ,,hershöfðingi" staldrar við eins og Jón Bjarnason en eins og allir vita þá var Jón í eina tíð ,,höfðingi á Hólum". Við skulum þess vegna taka mark á viðvörunarorðum hans. 

Ég bæti síðan hér, eftir á, inn myndbandi sem hægt er að finna á Youtube frá Lifandi mynd af mótmælum vegna Icesave frá 15. júní 2009. Þetta eru sannkallaðar hetjur sem standa þarna á Austurvelli og mótmæla í þágu núlifandi og komandi kynslóða Íslendinga. Átakanlegt myndband þar sem margt kemur fram sem maður hélt að væri óhugsandi á Íslandi en sýnir breytta nærmynd af þjóð í vanda.

Vill fresta umsóknarferli ESB

Veit nefndin ekki að ,,árið 2007" er liðið eða er þetta 5 ára áætlun í anda Sovét?

Þessi frétt virkaði á mig eins og frétt frá árinu 2007. Getur verið að þetta hafi verið gömul frétt sem hafi lent inn á mbl.is fyrir slysni? Eða hvað?

Já, Ísland skipi sér á ný í fremstu röð segir Dagur B. Eggertsson, framtíðarleiðtogi Samfylkingarinnar! Og hvenær var Ísland í fremstu röð? Takið eftir orðalaginu - á ný! Jú, var það þegar útrásin var í algleymingi og gullveislurnar voru haldnar í útlöndum með fólki úr viðskipta- og stjórnmálaheiminum?

Er þetta kannski nefndin sem Halldór Ásgrímsson skipaði til að ,,leggja grunn" að því að Ísland yrði fjármálamiðstöð heimsins? Já, sama nefndin og Halldór Ásgrímsson, Guðfaðir kvótakerfisins, setti vin sinn og flokksfélaga Sigurð Einarsson, bankastjóra og margverðlaunaðan af forseta og fjölmiðlum, til að stýra, rétt eftir að hann hafði skammtað sjálfum sér feitan kaupréttasamning og rétt eftir að hann hafði fengið afhenta um 200 milljóna arðgreiðslu úr einkabanka, sem stefndi lóðrétt til helvítis og tók heila þjóð með sér?

Eða er hér við völd ,,ráðstjórnarríkisstjórn" sem fer að dæmi gamla Sovét og gerir innantómar 5 ára áætlanir til að gefa fólkinu falsvonir? Þeir kunna þetta vissulega ýmsir harðir stuðningsmenn ríkisstjórnarinnar þar sem fremstur í flokki er Svavar nokkur Gestsson, sem Agnes Bragadóttir segir að hafi lært Stasi-fræði í Austur-Þýskalandi. Ég sel það ekki dýrara en ég keypti það og ekki fer Mogginn að ljúga úr þessu.   

Ísland skipi sér á ný í fremstu röð