Markríldeilan og aðildarviðræður við ESB eru tengd mál

Það þótti tortryggilegt af íslenskum stjórnvöldum að taka sterkasta leikmanninn í samningaviðræðunum um makrílveiðar við ESB og Norðmenn ,,út af vellinum" þegar leikar stöðu sem hæst. Hér á ég að sjálfsögðu við Tómas H. Heiðar, aðalsamningamann í makríldeilunni, en Tómas nýtur mikils trausts í alþjóðakerfinu enda hefur hann stýrt mörgum samningum farsællega í höfn. Samskiptahæfni hans, kunnátta og reynsla hefur skilað Íslandi miklum ávinningi í fjölmörgum samningum á undanförnum árum. Tómas þótti harður samningamaður fyrir Íslands hönd sem fulltrúum Evrópusambandsins þótti einkennilegt í ljósi þess að Ísland hefði sótt um aðild að Evrópusambandinu og samningaviðræður væru í gangi um tilslakanir af hendi sambandsins til Íslands frá sameiginlegum lögum og reglum ESB. Í ríkjum ESB sem eiga hagsmuna að gæta í makríldeilunni var þrýst á að tengja samningaviðræðurnar við Ísland um aðild og samninga um veiði á markríl. Miklir hagsmunir eru í húfi fyrir samningsaðila. Íslensk stjórnvöld hafa hins vegar þvertekið fyrir að Tómas hafi verið látinn hætta sem formaður vegna þrýstings frá Evrópusambandinu heldur hafi skipunartími Tómasar verið útrunninn og hann hafi þurft að snúa sér að öðrum brýnni verkefnum.  

Niðurstaða hefur nú fengist í hver muni stýra áframhaldandi viðræðunum um lausn á makríldeilunni. Það verður Sigurgeir Þorgeirsson, ráðuneytisstjóri í sjávarútvegs- og landbúnaðarráðuneytinu og formaður samningahóps Ísland um landbúnaðarmál við Evrópusambandið. Hann er jafnframt í aðalsamninganefnd Íslands. Þetta voru skilaboðin sem Evrópusambandið beið eftir og ekki verður séð annað en að fulltrúar þess geti vel við unað. Þar með er ekki sagt að gefið hafi verið eftir í deilunni. Sigurgeir þekki ég af einu góðu. Þar er vandaður maður á ferð og mun hann örugglega halda fast á íslenskum hagsmunum í komandi viðræðulotu.  

Vilja lenda makríldeilunni