,,Friður sé með yður"

 

Það fer ekki framhjá neinum hin mikla Þórðargleði Icesave-sinna þegar ESA hefur stefnt íslenskum almenningi vegna einkaskuldar útrásarvíkinga og bankaræningja, sem settu þjóðina á hausinn. Þetta kallast víst vinabragð hinna háu herra í Brussel. Og tímasetningin er vel við hæfi. Ekkert var betra til að spilla jólagleðinni fyrir íslensku þjóðinni. En á sama tíma er þetta jólaglaðningur fyrir Icesave-sinna sem berja sér á brjóst eins og hanar á hól og æpa: Ha, ha, ha ... Þetta sögðum við ykkur vitleysingarnir ykkar!

Og þetta gerist á sama tíma og Evrópusambandið logar stafnanna á milli. Á sama tíma og forsætisráðherra er í afneitun og utanríkisráðherra ver tíma sínum til að taka á móti vinum sínum frá Palestínu. Öll framganga Össurar í málefnum Ísraela og Palestínu Araba er í anda utanríkisráðherrans; að ala á óvinafagnaði. Ef þessi aðferðafræði við að koma á friði fyrir botni Miðjarðarhafs á að leiða til friðar og stöðugleika á þessum slóðum þá er ríkisstjórn Samfylkingar og Vinstri grænna vissulega norræn velferðarstjórn.

Evrópusamband sem fer í mál við veikburða smáríki sem rær lífróður vegna vanda sem á rætur að rekja til kröfu þess sama sambands um frelsi á fjármagnsflutningum milli ESB ríkja, án viðunandi eftirlitskerfis á milliríkjagrunni, lýsir betur en nokkurt annað hvers konar framtíð bíður Íslands ef við gerumst aðilar og lokumst inn í sambandinu á leið þess til sambandsríkis. Ef Evrópusambandið ræðst með þessum hætti á smáríki í smámáli hvernig bregst það við ef málefnið væri mikilvægari fyrir hagsmuni sambandsins? 

ESA stefnir Íslandi

Athugasemdir

[Jón Steinar Ragnarsson, 14.12.2011 kl. 21:56]

Upphaflega krafan var alltaf að fá þetta mál fyrir dómstóla, svo þetta er ekki eitthvað sem kemur flatt uppá nei sinna. Það sem er furðulegt er í þessu er að ESA skuli úrskurða í málinu strax og rök okkar vooru send, án þess að meta þau. Það kemur þó ekki á óvart þar sem yfirmanneskja ESA nefndarinnar var búin að dæma í málinu opinberlega fyrir löngu og er í sjálfu sér vanhæf þarna.

Ég hef ekki stórar áhyggjur af þessu. Þetta er í anda verklags á lægra dómstigi, þar sem málum er vísað áfram og menn treysta sér ekki til að taka endanlega afstöðu. Já menn vilja meina að þetta tengist ekkert ESB, en það gewrir það svo sannarlega vegna þess að ESA tekur mið af kröfum og lagatúlkunum ESB við þessa ákvörðun.

Bæði þessi glæpsamlega hlutdræga framkoma og makrílmálið t.d. ætti að vera nægilegt fyrir okkur til að draga ESB umsókn til baka og segja upp EES samningnu strax. Samningur sem leggur það á okkur að taka ábyrgð á glæfraskap einkafyrirtækja til þess eins að viðhalda trú á bankakerfi, sem hefur ekkert traust né getu, er ekki hagfelldur okkur og var ekki gerður til að tapa á honum og leggja allan ríkisjóð undir í póker einkaframtaksins. Það hlýtur hver maður að sjá.