Ísland er aðili að innri markaði ESB

 

Mikið gladdi það ýmsa að Ísland yrði af þúsund störfum ef fríverslunarsamningar kæmust á milli Bandaríkjanna og ESB ef Ísland væri ekki komið í Evrópusambandið. En, efin, eru þarna tvö. En svo kom fram í frétt mbl.is að viðskiptastjóri ESB hefði sagt ...

... að nánustu viðskiptaríki sambandsins ættu hvað mesta möguleika á því að hagnast á mögulegri fríverslun á milli þess og Bandaríkjanna. Einkum þau ríki sem væru aðilar að innri markaði ESB í gegnum samninginn um Evrópska efnahagssvæðið eins og Ísland.

En að sjálfsögðu var ekki sagt frá þessu í sjónvarpsfréttum kvöldsins og furðaði ég mig mest á því að ekki skyldi vera tekið viðtal við Árna Pál Árnason, formann Samfylkingarinnar, í kjölfar fréttarinnar til að lýsa yfir ábyrgð á hendur ríkisstjórn Íslands að kasta frá sér þúsund störfum! Það verður kannski bætt úr því á morgun.  

Kann að kosta Ísland þúsund störf

Viðskilnaður vinstri stjórnarinnar

 

Samfylkingin er alveg að tapa sér eftir tapið í síðustu kosningum. Árni Páll Árnason fær ótakmarkaðan tíma hjá fyrrv. ríkisfjölmiðlunum RÚV og Stöð2 til að túlka fréttirnar fyrir sjónvarpsáhorfendur til að tryggja að ekkert misskiljist. Frétt um ræðu forsætisráðherra á þjóðhátíðardaginn er varla lokið áður en fréttamenn stöðvanna tveggja fá réttu fræðimennina og Árna Pál til ,,að ræðu" fréttina, og til þess er gefinn lengri tími en fyrir fréttina sjálfa af atburðinum. Þannig geta þeir fáu kjósendur sem héldu trúnað við Samfylkinguna andað léttar og verið andvaka yfir einhverju allt öðru þá nóttina.

Þannig finnst forystu Samfylkingarinnar það ekkert óvenjulegt að halli á ríkissjóði verði mun hærri en fjárlög sögðu til um, og lofræður fyrrv. stjórnarliða fjölluðu um fyrir síðustu kosningar. Hvað eru 30 milljarðar á Icesave mælikvarða? Eða 400 milljarðar í uppsafnaðan ríkissjóðshalla frá árinu 2009? Var það ekki á þessum árum sem ríkisstjórnin stóð að aðför að lýðveldisstjórnarskránni fyrir á annan milljarð, setti ESB lestina af stað fyrir svipaða upphæð þegar allt er talið, byggði menningarhöllina við hafnarbakkann fyrir tugi milljarða, hækkaði kostnað við listamannalaun um fleiri hundruð prósent og þannig mætti lengri áfram telja. Á sama tíma keyrðu þeir þjóðfélagið í frost kyrrstöðunnar með skattpíningu á fyrirtækin og fólkið í landinu sem keyrði niður hagvöxt og skatttekjur til ríkisins. Tölurnar tala sínu máli eins og Bjarni Benediktsson, fjármálaráðherra, fór yfir á Alþingi í dag.

Við höfum slæma reynslu af stjórnarháttum Árna Páls Árnasonar, Steingríms J. Sigfússonar og félaga. Þeir fengu sinn tíma og tækifæri. Nú er komið að öðrum að sanna sig. Vonandi fara fréttastofur RÚV og Stöðvar 2 að stunda hér alvöru fréttamennsku og gefa nýjum stjórnvöldum skilning og svigrúm til að sýna hvað í þeim býr.

400 milljarða uppsafnaður ríkissjóðshalli

Sjálfstæðinu og fullveldinu fagnað á Austurvelli

Það má segja að með ríkisstjórn Sjálfstæðis- og Framsóknarflokks hafi þjóðin endurheimt trúna á sjálfa sig; trúna á að við sem þjóð við ysta haf getum verið fullvalda og sjálfstæð. Ræða Sigmundar Davíðs Gunnlaugssonar, forsætisráðherra, rammaði þetta ágætlega inn.

Það er alvarlegur misskilningur þeirra sem vilja að Ísland gerist aðili að Evrópusambandinu með kostum þess og göllum að þeir sem eru andvígir því séu einangrunarsinnar og vilji eigi eiga viðskipti og góð samskipti við aðrar þjóðir. Það er meinloka. Þvert á móti stendur Ísland og fellur með því að eiga góð samskipti og viðskipti við aðrar þjóðir á jafnréttisgrundvelli. Þess vegna höfum við verið aðilar að WTO viðskiptasamningum og erum þátttakendur í EES samstarfinu sem opnar okkur aðgang að innri markaði Evrópusambandsins. Þegar trúboðar ESB aðildar tala um að við verðum að ganga í Evrópusambandið til að tryggja frjáls viðskipti við ríki ESB þá virðist einhver hafa gleymt að upplýsa þá um að við erum þegar aðilar að innri markaði ESB ríkja, 27 að tölu, í gegnum EES. Eða hvað skortir þar upp á?

Vissulega er það rétt hjá forsætisráðherra að Evrópusambandið þarf að sanna sig. Ekki fyrir okkur heldur sjálfu sér. En við Íslendingar þurfum líka að sanna okkur og treysta stöðu okkar sem sjálfstæð og fullvalda þjóð við ysta haf. Eftir að hafa haft Samfylkinguna í stjórnarráðinu í sex ár og með forræði í utanríkismálum í fjögur ár þá er sannanlega þörf á því að snúa við blaðinu. Endurreisnin er hafin eins og heyra mátti í máli forsætisráðherra í dag.

Evrópusambandið þarf að sanna sig

,,Letin tekur af oss tvöfaldan skatt, óþarfakaupin þrefaldan og heimskan fjórfaldan"

Jón Sigurðsson ,,forseti" vitnar hér í Franklín í ritgerð sinni um verslun og verslunarsamtök sem kom út árið 1870, 15 árum eftir að Íslendingar fengu fullt verslunarfrelsi. Þetta á jafnvel við í dag og þá. Og Jón Sigurðsson heldur áfram:

... og þessa skatta geta hvorki lögin né yfirvöldin lækkað né tekið af. Það eru ,,kaupstaðarskuldirnar", segja menn, sem binda allt í klafa, svipta menn öllu frelsi og loka öllum vegi til framfara. Þetta getur verið, en er þá þetta sá fjötur, sem enginn getur losað sig úr? Vér ætlum, að þeta sé ekki svo, heldur að hver sá maður eða hvert það félag, sem finnur til þess ófrelsis sem skuldirnar valda, muni geta létt því af sér með skynsamlegri aðferð, en hver sem ekki getur fengið það af sér eða ráðið við sig sjálfur, hann hefur engan rétt á að kvarta undan öðrum en sjálfum sér.

Svo mörg voru þau orð. 

Lögleysa og siðleysa á Bessastöðum?

Það voru ekki skemmtilegar fréttirnar um okkar ástkæru forsetafrú. Enn á eftir að útskýra hvernig þetta var hægt, svo ekki sé talað um siðferðið sem liggur þarna að baki. Forseti er nú einu sinni forseti þjóðarinnar og að forsetafrú ákveði að skrá lögheimili sitt erlendis er náttúrulega ekkert annað en hrein og bein móðgun við þjóðina. Við vitum allt um það að allir eru ekki jafnir undir lögunum, aðrir eru jafnari en aðrir, en að við hljótum að setja mörkin við forsetahjónin á Bessastöðum. Mér er illa brugðið enda hef ég verið einarður stuðningsmaður Ólafs Ragnars Grímssonar forseta.

Vilmundur Gylfason heitinn var frægur fyrir orðatiltækið löglegt en siðlaust. En er þetta ekki bæði lögleysa og siðleysa?

Vonandi koma fram haldbærar útskýringar frá forsetaembættinu sem varpa ljósi á að þetta sé allt saman einn allsherjarmisskilningur.